இலங்கைத் தூதரை அழைத்து கண்டிக்குமாம் இந்தியா

தமிழக முதல்வர் ஜெயலலிதா மற்றும் பிரதமர் நரேந்திர மோடியை இழிவு செய்து இலங்கை பாதுகாப்பு அமைச்சு இணையத் தளத்தில் கட்டுரை வெளியான விவகாரம் குறித்து இலங்கைத் தூதரை நேரில் அழைத்து விளக்கம் கேட்கப்படும் என்று வெளியுறவுத் துறை அமைச்சர் சுஷ்மா ஸ்வராஜ் தெரிவித்துள்ளார்.
இன்று திங்கட்கிழமை இந்திய மக்களவையில் அ.தி.மு.கவினர் கடும் அமளியில் ஈடுபட்டனர்.

இதனால் பல தடவைகள் அவை ஒத்திவைக்கப்பட்டது. இந்த நிலையில் இந்திய வெளியுறவுத்துறை அமைச்சர் உரையாற்றினார்.

அவர் தனது உரையில், "இந்திய அரசு இலங்கையின் இந்தச் செயலை வன்மையாகக் கண்டிக்கிறது. இலங்கைத் தூதரை நேரில் அழைத்து கண்டனம் தெரிவிக்கப்படும்" - என்றார்.