யுவராஜ் சிங் மீதான விமர்சனம் நியாயமற்றது – கோஹ்லி

உலகக் கிண்ண இருபதுக்கு-20 கிரிக்கெட் போட்டியின் இறுதிப் போட்டிக்கு பிறகு யுவராஜ் சிங் மீது தொடுக்கப்பட்ட விமர்சனம் நியாயமற்றது என விராட்​ கோஹ்லி  தெரிவித்துள்ளார்.

சார்ஜாவில் கடந்த வியாழன் நடைபெற்ற ஐ.பி.எல் கிரிக்கெட் போட்டியில் பெங்களூர் ரோயல் செலஞ்சர்ஸ் அணி 8 விக்கெட்டுகளால் வெற்றிபெற்றது. டெல்லி டேர்டெவில்ஸ் அணிக்கு எதிரான இந்த போட்டியில் யுவராஜ் சிங் 29 பந்துகளில் 52 ஓட்டங்களைப் பெற்றுக் கொடுத்தார்.

உலகக் கிண்ண இருபதுக்கு-20 கிரிக்கெட் போட்டிக்குப் பிறகு யுவராஜ் சிங் மீது தொடுக்கப்பட்ட விமர்சனம் நியாயமற்றது. 2007இல் உலகக் கிண்ண இருபதுக்கு-20 போட்டி, 2011இல் உலகக் கிண்ணம் என்பவற்றை தந்தவர் யுவராஜ் சிங் தான், அவரைப் போன்ற ஒரு வீரர் அணியில் இருப்பது மிக முக்கியமானது என்றார்.

கடந்த 6ஆம் திகதி இடம்பெற்ற உலகக் கிண்ண இருபதுக்கு-20, இலங்கை அணியுடனான இறுதிப்போட்டியில் யுவராஜ் சிங் 21 பந்துகளில் 11 ஓட்டங்களை மாத்திரமே பெற்றுக்கொண்டதால், தோல்விக்கு அவரே காரணமென விமர்சனங்கள் எழுந்தமை குறிப்பிடத்தக்கது.